10 جمل رح تسمعها من قرايبك قبل نتيجة البكالوريا: جهز حالك لردود و معانات

سنة البكالوريا مو بس دراسة من الجلدة للجلدة هي حالة استنفار عام و معانات! كل شي حواليك بيتغيّر: نومك، أكلك، أعصابك، وحتى الناس! فجأة الكل بيصير خبير نفسي وتوجيهي، وكل حدا عندو جملة جاهزة بيحس إنو لازم يقلك ياها… جمل بتتكرر كل سنة، لكل طالب، وكأنها طقس رسمي من طقوس الشهادة!

أشهر الجمل يلي بتلاحق طلاب البكالوريا:

1. “هي السنة بتحدد مصيرك ، شدّ حيلك”!
الجملة الذهبية يلي بتجي دايمًا على شكل تحفيز… بس بترفع الضغط!

2. “نحنا كنا ندرس عالشمعة وما نشتكي!”
ما عاد في بكالوريا متل أيامنا… نحنا كنا ندرس ونتعذب، إنتو مرتاحين وكل شي لخدمتكم ! جماعة الشمعة موجودين بكل بيت، وهدفهم الوحيد إنك تحس حالك مدلّل ومرفه… حتى لو عم تدرس تحت ضو الليدات وتتحمّل تقنين الكهرباء.” 

3. شو ناوي تفوت؟ طب ولا هندسة؟”
عأساس هني الخيارين الوحيدين بالحياة ،صرنا بالقرن الواحد والعشرين ولسه في ناس مفكرين الحياة فيها تخصصين وبس.

4. “ابن خالتك جاب فوق الـ230 ، ما شاء الله! إنت اديش ناوي تجيب؟”
الابن النموذجي، معيار النجاح المطلق، يلي بيطلع اسمه بكل مناسبة.

5. “إنت شاطر بس ما بتركّز!”
الكليشيه الأبدي… الكل شاطر، بس عنده “مشكلة صغيرة” بسيطة متل التركيز، الفهم!

6. “احكيلنا كيف كانت الأسئلة؟ سهلة؟ صعبة؟ متوقعة؟”
وإنت لساتك مصدوم من السؤال الأخير يلي ما مرق عليك بحياتك!

7. عم تدرس شي ولا ماسك الموبايل كالعادة؟”
حتى لو كنت عم تراجع ملخصات على شي تطبيق، مجرد إنك ماسك التلفون يعني إنك حدا ضايع ومستقبلك بخطر!

8. “أديش بتتوقع علامتك بهالمادة؟”
يعني لازم تكون خبير إحصاء وتحليل ذاتي فوراً بعد كل امتحان.

9. “إنت بس خلّص بكالوريا، وبتنبسط بعدا!”

الجملة المعروفة… يلي بيقولوها وهنن عرفانين إنو البكالوريا هي البداية بس، والجايات أعظم.

10. وبتجي بعدها الجملة الأشهر“بكرا بالجامعة بترتاح!”
يلي كل طالب جامعة بيضحك بس يسمعها، لأنو بيعرف الحقيقة المرة!

الحياة مع البكالوريا: عبارات ومعانات

الحياة مع بكالوريا بالشام ما بتمشي بدون هالعبارات يلي بتتكرر كأنها جزء من الجو العام للبلد. والمضحك بالموضوع إنو الكل بيحس حالو عم يدعمك، بس بالحقيقة إنت عم تغرق تحت ضغط التوقعات، والمقارنات، والخوف من “شو رح يصير بعد النتائج؟” 

فإذا كنت عم بتمر بفترة معانات البكالوريا، خليك متأكد إنك مو لحالك… كل طلاب سوريا عم يمرّوا بنفس الفيلم، نفس الحكي، ونفس الصراع بين الدراسة والتعب النفسي. بس لا تنسى… درجاتك ما بتحدد قيمتك، واجتهادك هو يلي بيعمل فرق  ويا رب النجاح والتميز يكون من نصيب كل طالب بكالوريا!

تحقق من قسم #مدونة للمزيد!