كول وشكور
بسطات الأكلات بالشام: دفا الروح وطعمة بتعيش معك طول العمر
وقت تيجي العواصف، بتصير ريحة الأكلات الشتوية طالعة من كل زاوية، والدخنة الطالعة من بسطات الاكل بتغري المارة بكل الشوارع بالشام. من الجاحظ والجسر الأبيض لـ باب توما وركن الدين، الشام كلها بتصير مليانة بحركة ولمّة وريحة بتفتح النفس.
وين ما بتروح، بتلاقي بسطات عامرة بناس عم تتدفى بلقمة دافية وريحة دخنة بتفوت عالقلب واصوات البياعين معبية الدنية وبتشدك لعندا لو كنت بأخر الطريق. الشام بالشتوية إلها طابع خاص… كل لقمة بتحكي حكاية وكل زاوية فيها روح ودفا والفة.
الفول النابت وكاسة المرقة… دفا ما إلو مثيل
مين فينا ما وقف عبسطة فول ودفا حالو بلقمة فول سخنة؟
صحن الفول مع رشة كمون وملح وليمون ، ومعو كاسة مرقة بتشهي عم تغلي غلي… طعمة بتدفّي القلب قبل الجسم! وريحة الفول الطيبة بتخليك توقف حتى لو كنت مستعجل.
بليلة… حبّة حبّة والدفا يزيد
البليلة هي ملكة البسطات بالشتا!
حمص مسلوق مع رشة كمون وليمون وملح، وشوية حد خفيف… لقمة بتفوت على القلب دغري!
ومتل ما بنقول بالشام بليلة بلبلوكي بالليل سلقوكي وبالنهار باعوكي وبالملح والكمون زينوكي!
كستنا مشوية… ريحة بتعبّي الشوارع
الكستنا المشوية عالصاج، ما إلها منافس بالبرد.
ريحة الفحم، وقعدة الناس حوالين بسطات بالشام، وأنت عم تمسكها بأيديك البردانين… هاي لحالها قصة شتوية كاملة!
درة مشوية او مسلوقة… بساطة بتدفّي القلب
ريحة الدرة المشوية عالفحم بتسبقها! وطعمة الدرة المسلوقة مستحيل تنساها وخاصة اذا مع اضافات!
بتاخدها سخنة من إيد البياع … بتنسى البرد وبتعيش أحلى لقمة.
بطاطا حلوة مشوية… حلاوة الشتا
البطاطا الحلوة المشوية عالفحم، قشرتها مقرمشة ومن جوّا بتدفيك وبتدوب بتمك دوبان.
كل لقمة منها بتاخدك لأيام الطفولة والدفا يلي ما بينتسى.
ليش الشام بالشتا غير؟
لأنها مدينة بتعرف كيف تدفيك من جوا… مو بس باللبس، بلقمة من محضّرة بحب، وبلمة ناس حوالي بسطات كلها طيبة ودفا بالشام.
البرد؟ بده لقمة بتدفّي القلب!
بسطات الشوارع مو مجرد أماكن بيع، هي محطات حب ولمّة، ناس عم تتشارك الدفى، وطعمة الأكلات يلي بتحمل معها نكهة الأصالة والحنين.
وين بتحبوا تروحوا لتاكلوا أكلات شتوية بالشام؟
وشو أكتر لقمة بتحسوا إنها بترد الروح؟
انبسطت بهالمقال عن بسطات الأكلات الشتوية بالشام؟ تأكد تزور قسم #كول-وشكور على موقعنا لتشوف المزيد!