وين نروح
٤ وجهات لطلعة عيد الفطر: مشوار بيشبِه العيلة وريحة العيد!
العيد ما بيكمل بدون جمعة حلوة ومشوار بيفتح النفس، خصوصاً لما تكون الطلعة منظمة، المكان حلو، والجو رايق. وإذا كنت عم تدوّر على أفكار لمشوار العيلة بـ عيد الفطر، هي أربع وجهات بتجنن، بتجمع المتعة، الراحة، الطبيعة، المغامرة، وكتير لحظات حلوة بتنعاد كل سنة مع العيلة والأصحاب:
1. المنتزهات والمنتجعات: قعدة رايقة، أكلة طيبة، وأجواء كاملة
لما بدك تطلع قعدة منظمة ومرتبة، مع أكل طيب وجو بيجمع الكبير والصغير، بتلاقي منتزهات ومنتجعات بتلبّي كل هالرغبات.
من أشهرها:
- منتزه الجليلاتي: قعدة شامية بتفتح النفس، مع أركيلة، وجبات، صاجيات،مدينة العاب وجو مناسب لكل أفراد العيلة.
- منتزه الجميرة: بجانب الأرض السعيدة، فيه خدمة شوي وتسخين، أكل جاهز، وصالة ألعاب للأطفال.
- منتزه النبعة : على طريق المطار منتزه ومطعم النبعة بيقدملك خدمات متكاملة بالاضافة لحديقة حيوانات.
- منتجع بكرا أحلى – بيت تيما: مغامرات زيب لاين، صالة ألعاب VR، سينما 3D، جلسات بين الشجر، وحديقة حيوانات بتعجب الكبار والصغار.
2. الطبيعة والهدوء: راحة البال على أصولها
مو دايمًا لازم تكون الطلعة مليانة ضجة… أحيانًا بس بدنا شجر، مي، وقعدة بتخلينا ننسى تعب السنة.
من أجمل المناطق الطبيعية يلي فيك تزورها:
- يعفور: طبيعة خلابة، نهر، شجر، وهوى عليل
- بلودان، مضايا، بقين: مناطق باردة، خضارها بيشرح القلب
- شلالات بيت جن: جو معتدل، وطبيعة بترد الروح
3. الأرض السعيدة – أكبر مدينة ألعاب بسوريا!
للعيلة يلي بتحب الحركة، والولاد يلي طاقتن ما بتخلص، ما في أحلى من زيارة مدينة الألعاب الأكبر بسوريا – الأرض السعيدة.
فيها ألعاب للصغار والكبار، قعدات، مطاعم ، ومكان واسع بيسمحلك تستمتع من قلبك، خصوصاً إذا دمجتها بزيارة منتزه قريب متل الجليلاتي أو الجميرة
4. المولات والمطاعم: قعدة رايقة وترفيه بنفس الوقت
وللي بحبوا المشاوير المريحة، المكيفة، وفيها كل شي تحت سقف واحد… المولات دايمًا خيار آمن وحلو لكل العيلة.
وهون أهم المولات يلي بتستاهل مشوار العيد:
- شام سيتي سنتر و دامسكينو مول – كفرسوسة
مطاعم: بيت المختار، هاينيس،العكيد ، مطعم ديزني..
ومحلّات عالمية،وصالة العاب للصغار ومناطق مخصصة للترفيه للكبار وسينما للي بحب الأفلام
- أب تاون – مشروع دمر
مطاعم حديثة وكافيهات،قسم العاب وصالة ترفيهية للكبار والصغار وأجواء راقية بعيد عن الزحمة
الخلاصة؟
مهما كان مزاجك، في وجهة بتناسبك:
- بدك تروق وتشم هوا؟ جرّب المناطق الطبيعية
- بدك العاب وضحك وحركة ؟ جرب الأرض السعيدة
- بدك قعدة فيها كل شي؟ المولات والمنتجعات خيارك الأول
عيد الفطر فرصة لنعيش لحظات حلوة ما بتنتسى، و الـ مشوار الصح بيترك أثر بذاكرة الكل.
اختار وجهتك، حضّر حالك، وخلّي العيد يكون مليان ضحك، صور، وريحة مشاوي!